Гүндийн Багаа

Улаанбаатар хотын захиргааны дарга

1944-1956 он

   Г.Багаа хуучин Түшээт хан аймаг, Дэлгэрхангай уулын хошуу одоогийн Өмнөговь аймгийн Ханхонгор сумын нутагт төржээ. Найман нас хүртэл эхийн асрамжинд гэртээ өсч 15 нас хүртэл бусдад зарцлагдаж, монгол бичиг бие даан сурч 1931 онд Улаанбаатар хотод соёлын довтолгооны багш бэлтгэх нэг жилийн курс, 1935-1936 онд ЗХУ-д дотоод яамны нэг жилийн курс, 1940-1944 онд ЗХУ-д Дорно дахины дээд сургууль, 1956-1959 онд коммунист намын дээд сургуульд тус тус суралцан төгссөн. 1932-1933 онд Хөвсгөл аймгийн Аржаргалант суманд соёлын довтолгооны багш, 1933-1940 онд Дотоодыг хамгаалах газар төлөөлөгч, тасгийн дарга, 1944-1956 онд Улаанбаатар хотын гүйцэтгэх захиргааны дарга, 1959-1963 онд Хөвсгөл аймгийн АДХ-ын гүйцэтгэх захиргааны дарга, 1963-1968 онд БНМАУ-аас БНКУ-д суух Онц бөгөөд Бүрэн эрхт элчин сайд, 1966-1968 онд БНХАУ-д БНМАУ-ын Элчин сайдын яамны элчин зөвлөх, 1968-1969 онд БНМАУ-ын СнЗ-д зохион байгуулагч, 1969-1974 онд Хөвсгөл аймгийн Бүрэнтогтох суманд сум, нэгдлийн даргаар ажиллаж байгаад 1974 онд нас баржээ.

Содномын Шагдар

Улаанбаатар хотын захиргааны дарга

1942-1944 он

    С.Шагдар хуучин Сэцэнхан аймгийн Өндөрхаан уулын хошуу одоогийн Хэнтий аймгийн Идэрмэг сумын нутагт 1910 онд төрсөн. Багадаа гэрийн багшаар монгол бичиг заалгаж суралцсан. 1930-аад онд цэргийн албанд орж хугацаат албаны цэрэг, бага, дунд тушаалын дарга болж 1939 онд Халх голын байлдаанд оролцож явжээ.
    МАХН-ын Төв Хорооны тэргүүлэгч, БНМАУ-ын Бага хурлын тэргүүлэгч, Сайд нарын Зөвлөлийн гишүүдийн хамтран хуралдсан хурлын 1939 оны 12, 68, 39 дүгээр тогтоолоор тус улсын зүүн хязгаарт Японы самуурай нартай баатарлагаар байлдаж, өөрийн эх орныг батлан хамгаалах хэрэгт үнэнч гавшгайчаар зүтгэж шалгарагсдын дотроос тавин шинэ хүчнийг улсын хариуцлагатай ажилд дэвшүүлэн ажиллуулахад бэлтгэж ирүүлэхийг Цэргийн яаманд даалгасан ёсоор энэ завсар 21 хүнийг хүлээн авч, Намын Төв Хороо, Бага хурал, Засгийн газраас тусгай комисс томилж, уг хүмүүсийн чадвар байдлыг танилцан үзэж, ямар ажилд тэнцэхийг боловсруулсан төлөвлөгөөнөөс үндэслэн эдгээр шинэ хүчнүүд хэн хэнийг ямар ажилд томилох тухай хэлэлцээд мөн тогтоолын 4 дүгээр зүйлээр нөхөр Шагдарыг хотын захиргааны орлогч даргаар томилж, гэрэл зурагтай нь “Үнэн” сонины 1939 оны 10 дугаар сарын 13-ны өдрийн 117 дугаарт нийтэлсэн байна.

Эрэндоогийн Лувсаннаваан

Улаанбаатар хотын захиргааны дарга

1941. 09-11 он

     Э.Лувсаннаваан хуучин Сэцэнхан аймаг Өндөрхаан уулын хошуу одоогийн Хэнтий аймгийн Мөрөн сумын нутагт 1908 онд төрсөн. Багадаа гэрийн багшаар бичиг заалгаж суралцсан. Тэр 1928 оноос баг, хорины дарга, 1930-1935 онд Цэрэгт бага, дунд тушаалын дарга, аймгийн цэргийн хэлтсийн дарга, Монгол банкинд байцаагч, даргын дагалдан, хэлтсийн эрхлэгч, аймгийн анхны хэлтсийн даргаар ажиллаж байгаад 1939-1940 онд Улаанбаатар хотын намын хорооны орлогч дарга, 1940-1941 онд Хөвсгөл аймгийн захиргааны дарга, 1941 оны есдүгээр сараас 11 дүгээр сар хүртэл Улаанбаатар хотын захиргааны даргаар хоёр сарын хугацаанд ажиллажээ.
     Э.Лувсаннаваан МАХН-ын Х, БНМАУ-ын VIII хуралд төлөөлөгчөөр оролцож, Намын төв хорооны гишүүнээр сонгогдож байсан юм. МАХН-ын Төв хорооноос намын байгууллага, гишүүдэд лам нарын асуудал, хүрээ хийдийн талаар илгээсэн “нууц” захидалтай танилцаад “Доод лам нар” гэгчийг жирийн ардын адил үзэж байх тухай МАХН-ын Төв Хороонд 1938 онд зөв зүйтэй асуудал оруулж бичсэн нь хариултын хамт хэвлэлд нийтлэгдэж байжээ.

Ломбодонойн Дамдин

Улаанбаатар хотын захиргааны дарга

1940-1941 он

     Хуучин Хан-Хэнтий уулын аймгийн Оцолсансар уулын хошуу, одоогийн Дорноговь аймгийн Их-Эрээн сум /1942 онд Дундговь аймагт шилжээд 1952 онд татан буугдсан/ -ын нутагт 1906 онд төрсөн. 1924 онд МАХН-ын гишүүнд элссэн. 
   1922-1924 онд Оцолсансар уулын хошууны тамгын газар бичээч, 1924 онд Намын сургууль анх байгуулагдахад орж, уг сургуулиа төгсөөд Хантайшир уулын хошуунд Залуучуудын эвлэлийн сургагч, дараа нь Дорноговь аймгийн намын хорооны даргаар 1931, 1934 онд хоёр удаа ажиллаж, 1938 оноос Увс аймгийн хоршоодын холбооны дарга, 1940 оны тавдугаар сараас Улаанбаатар Хотын захиргааны орлогч дарга, 1941 оны долдугаар сарын 18-наас 1941 оны наймдугаар сарын 25 хүртэл хотын захиргааны даргаар нэг сар гаруй хугацаанд ажиллажээ.
    Г.Дамдин МАХН-ын IX, улсын VIII их хуралд төлөөлөгчөөр оролцож, МАХН-ын Төв Хорооны гишүүнээр сонгогдож байв. Г.Дамдингийн хөдөлмөр бүтээлийг үнэлж “Хөдөлмөрийн гавьяаны одон”, Ардын хувьсгалын 15 жилийн ойн хүндэт тэмдгээр шагнасан бөгөөд 1933 онд Октябрийн хувьсгалын ойн баярт оролцох Монголын төлөөлөгчдийн бүрэлдэхүүнд орж ЗСБНХУ-д очсон байна. Тэрээр “Говийн хүүхэн Гүндэгмаа” гэдэг драмын жүжгийн зохиол бичиж, 1930 онд өөрөө оролцон тоглож байсан нь тэр үедээ хот хөдөөд нэлээд дэлгэрч байсан билээ.

Өлзийцогтын Мажиг

Улаанбаатар хотын захиргааны дарга

1940-1941 он

Ө.Мажиг хуучин Дарьгангын хошуу одоогийн Сүхбаатар аймгийн Онгон сумын нутагт малчин ардын гэрт 1910 онд төржээ. Багадаа гэрээр монгол бичиг сурчээ.1926 оноос хязгаарын цэрэгт тал бичээчээр ажиллаж, МАХН-ын гишүүнд 1929 онд элссэн. 1929-1938 онд Дорнод аймагт аймгийн шүүхийн нарийн бичгийн дарга, шүүхийн дарга, аймгийн прокурор,аймгийн намын хороонд зохиолын хэлтсийн эрхлэгч, 1938-1940 онд Сэлэнгэ аймгийн хоршоодын холбооны даргаар ажиллаж байв. Ө.Мажиг 1940 оны тавдугаар сард Улаанбаатар хотын дөрөвдүгээр их хурлаас хотын захиргааны даргаар сонгогдон, 1941 оны долдугаар сар хүртэл ажиллажээ. Ө.Мажиг 1941-1950 онд Хоршоодын төв холбооны дарга, БНМАУ-ын Ерөнхий сайдын орлогч, Худалдааны яамны сайдаар ажиллаж байгаад 1950-1953 онд Намын дээд сургуульд суралцаж төгссөн. 1953-1955 онд Сэлэнгэ аймгийн хөдөлмөрчдийн депутатын хурлын гүйцэтгэх захиргааны дарга, дараа нь БНМАУ-ын Сайд нарын Зөвлөлийн Хэрэг эрхлэх газарт нууцын эрхлэгчээр ажиллаж байгаад 1968 онд өндөр насныхаа тэтгэвэрт гарчээ.