Буурлууд энгэртээ одон медалиа гялалзуулав

1945 оны чөлөөлөх дайны ялалтын  ойг тохиолдуулан эх орныхоо төлөө амь насаа хайрлалгүй тэмцэж явсан зарим ахмад дайчдад Монгол Улсын Ерөнхийлөгч Ц. Элбэгдорж зарлиг буулган шагнал гардуулахаар болжээ. Цэргийн гавьаны улаан тугийн одон болон цэргийн гавяаны одон хүртэхээр болсон буурлууд өнөөдөр Нийслэлийн Засаг даргын тамгын газарт цугларцгаалаа.  Тэдэнд төр засгийн энэхүү нэр хүндтэй одонг Засгийн газрын гишүүн, Батлан хамгаалахын сайд Л. Болд, НИТХ-ын дарга Т. Билэгт,  Нийслэлийн Засаг дарга бөгөөд Улаанбаатар хотын Захирагч Г. Мөнхбаяр, Нийслэлийн  ЗДТГ-ын Цэргийн штабын дарга хурандаа Ж. Болдбаатар нар энгэрт нь зүүж өглөө.  Цэргийн гавьяаны улаан тугийн одонгоор Хан-Уул дүүргийн 9 дүгээр хорооны иргэн, өндөр настан Х. Сэтэв, мөн тус дүүргийн 3 дугаар хорооны иргэн өндөр настан Б. Сааралдай, Сүхбаатар дүүргийн 6 дугаар хорооны иргэн өндөр настан Д. Занашир нарын 11 буурал  хүртсэн бол Цэргийн гавьяаны одонгоор Хан-Уул дүүргийн 9 дүгээр хорооны иргэн  өндөр настан Ц. Лувсандугар,  Баянгол дүүргийн 3 дугаар хорооны иргэн өндөр настан С. Базаржав нарын 7 буурай шагнууллаа.  Түүнчлэн нийслэлийн бүх дүүрэгт чөлөөлөх дайнд оролцож дарийн утаа үнэрлэж явсан  буурлуудад шагнал олгох арга хэмжээ явагдсан байна.