Нарны гүүрийн ажил урагштай байна

Нийслэлийн Засаг дарга бөгөөд Улаанбаатар хотын Захирагч Г.Мөнхбаяр өнөөдөр Тээврийн товчооны урд баригдаж буй Нарны гүүрийн барилгын ажлын явцтай танилцлаа. Хотын төв замын ачааллыг ихээхэн хөнгөлөх энэхүү ажилд хотын зүгээс онцгой анхаарал тавьж, өөрсдийн зүгээс шалтгаалах бүхий л асуудлыг шийдвэрлэж өгсөн. Одоогоор ямар нэгэн хүндрэл саад гараагүй, ажил төлөвлөгөөний дагуу урагшилж байгаа бөгөөд гүүрийн багананы суурийн цутгалтыг 10 дугаар сарын 20 гэхэд дуусч, дараа нь төмөр арматуруудыг зангидах ажилд орох юм. Барилгын ажилд нийтдээ 70 орчим хүн ажиллаж байна.
Хотын дарга гүүрний ажлын явц ямар нэгэн саадгүй, урагштай байгаад талархал илэрхийлээд, энэхүү бүтээн байгуулалтыг богино хугацаанд үр дүнтэй гүйцэтгэхэд орон нутгийн зүгээс шаардлагатай бүхий л асуудлыг хамтарч шийдвэрлэхэд бэлэн байгаагаа онцоллоо.