Гурвалжингийн гүүр нээгдлээ

Хичээлийн шинэ жил эхэлж олны  хөл хөдөлгөөн буцлахаас өмнө  “Гурвалжингийн гүүр” нээгдлээ. Анх 1989 онд ашиглалтад орсноос хойш их засвар хийгдээгүй өдийг хүрсэн энэ их ажлын ард гүйцэтгэгч байгууллагууд  гарч байна.  Өнгөрсөн жил цуцлагдаж  байсан  гүүрийн их засварыг  БНХАУ-ын хөрөнгө оруулалттай “Эйч Кей Пэ” компани  хийсэн бол замын ажлыг “Улаанбаатар зам засвар арчлалт” компани хариуцаж улсын комисст хүлээлгэн өгсөн юм.   Гурвалжингийн гүүр болоод замын хучилт зураг төсвийн дагуу 5 см-ийн зузаантай тавигдсан гэж байна.  Зам засварын ажилд шаардлагатай материалуудыг “Улаанбаатар зам засвар арчлалт” компани өөрийн үйлдвэрээсээ авч ашигласан гэж мэдээллээ.  Асфальт хучилтын бэхжилтийн хугацаанд хангалттай цаг хугацаа зарцуулсан болохоор хүнд даацын машин механизмууд торохгүй давхиж  болно гэж  нээлтийн үеэр холбогдох албаныхан тодотгоно лээ. Ийнхүү “Гурвалжингийн гүүр” нээгдснээр 2 талдаа зорчих хэсгээр гурав гурван эгнээ машин явж хөдөлгөөний ачаалал эрс багасах боломж бүрдлээ.