6 дүүрэгт 215 обьектийг чөлөөлж, явган хүний зам гаргана

Нийслэлийн Засаг даргын захирамжийн дагуу зохион байгуулж буй “Явган хүний зам” арга хэмжээг зохион байгуулах ажлын хэсгийнхэн дүүргүүдээс ирүүлсэн судалгааг нэгтгээд байна.  Дүүргийн газрын албадаас нийтийн эдэлбэрийн гудамж талбай, явган хүний замын байдалд үзлэг шалгалт хийж, дүүргийнхээ хэмжээнд явган хүний зам талбай хийж тохижуулах шаардлагатай байршил, явган хүний зам хаасан хашаа, өргөтгөл, объектуудын судалгааг гаргаж ирүүлжээ. Судалгаагаар нийслэлийн 6 дүүргийн хэмжээнд 77 байршилд явган хүний замыг засах, газрыг чөлөөлөх, тохижуулахын тулд 215 объектийг чөлөөлөх шаардлагатай агаад эдгээрийг чөлөөлөх, явган хүний шинэ зам тавих зэрэгт 150-иад сая төгрөг шаардлагатай гэсэн тооцоо гарчээ.
Ажлын хэсгийнхэн өнөөдрөөс эхлэн явган замын тохижилт хийх шаардагатай байршлын судалгааг холбогдох газруудад хүргүүлж, зөрчил бүхий иргэд, аж ахуйн нэгж, байгууллагуудад газар чөлөөлөх мэдэгдэл хүргүүлэхээр болсон байна.

Тооллого явуулах дотоод зохион байгуулалтаа сайтар хангахыг үүрэг болголоо

72 хоногийн дараа эхлэх Монгол Улсын хүн, ам, орон сууцны тооллогын бэлтгэл ажил, гардан зохион байгуулах хүмүүсээ давтан сургах талаар орон нутгийн удирдлагууд онцгой анхаарч ажиллахыг өнөөдөр хуралдсан нийслэлийн нутгийн захиргааны байгууллагын удпирдах ажилтны шуурхай зөвлөлгөөн дээр хотын дарга үүрэг болголоо.
10 жил тутам явагддаг энэхүү тооллогын бэлтгэл ажлыг Нийслэлийн Засаг даргын баталсан “Хүн ам, орон сууцны тооллогыг нийслэл хотод зохион байгуулах арга хэмжээний нэгдсэн төлөвлөгөө”-ны дагуу хугацаанд нь өндөр зохион байгуулалттай хийж гүйцэтгэхийг тэрбээр даалгаад, энэхүү ажлын үр дүнг иргэдэд сайтар ойлгуулахыг даалгасан байна.
Энэ удаагийн Монгол Улсын Хүн ам, орон сууцны тооллого “Хүмүүнд төр эрхэм, төрд хүмүүн эрдэнэ” уриан дор 11 дүгээр сарын 11-ний өдөр эхэлж, 7 хоногийн хугацаанд болох юм.